Бүгін «Назарбаев Зияткерлік мектептері» дербес білім беру ұйымы «Келешек мектептері» ұлттық жобасының педагогтеріне тәжірибе тарату жұмыстарын бастады. Өңірлердегі NIS базасында ұйымдастырылған «Заманауи мектеп зертханасы: мұғалімге арналған практикалық дағдылар» тақырыбындағы семинар-практикумдерге еліміздің 169 мектебінен 1300-ге жуық педагог қатысуда.

Семинар-практикумдер аясында Назарбаев Зияткерлік мектептерінің пән мұғалімдері, NIS Педагогикалық шеберлік орталығының тренерлері, сондай-ақ ауылдық тірек мектептердің ұстаздары өздерінің үздік тәжірибелерін бөліседі.

Үш күнге жоспарланған біліктілікті арттыру шаралары физика, химия, биология, информатика, STEAM және робототехника пәндері бойынша өтеді. Семинар-практикумдер мұғалімдердің зертханалық жабдықтарды білім беру үдерісінде тиімді әрі қауіпсіз қолдану дағдыларын дамытуға және жаратылыстану-ғылыми пәндерді оқытудағы практикалық әдістерін жетілдіруге бағытталған.