Конкурс жөнінде хабарлама

Құрметті үміткерлер мен ата-аналар!

«Назарбаев Зияткерлік мектептері» дербес білім беру ұйымы 2025–2026 оқу жылында Назарбаев Зияткерлік мектептерінің 7-сыныптарында оқуға үміткерлерге Қазақстан Республикасы Президентінің «Өркен» білім беру грантын тағайындау үшін конкурстың өтетін мерзімін жариялайды.

Құжат қабылдау 2025 жылғы 8-қаңтардан 11-ақпанға дейін жүргізіледі.

Кешенді тест 2025 жылғы 27, 28 наурыз күндері өтеді.

Ресми хабарлама

Соңғы кезде оқушыларды Назарбаев Зияткерлік мектептеріне түсу үшін қабылдау емтихандарына дайындауға қатысты кейбір білім беру қызметтерін ұсынып жүрген ұйымдар мен жеке тұлғалардың өз сайттарында және жарнамалық материалдарында «Назарбаев Зияткерлік мектептері» ДББҰ ресми логотипін заңсыз қолдану, сондай-ақ дайындық тесттік тапсырмалар жинағын шығару оқиғалары жиі кездесуде.

«Назарбаев Зияткерлік мектептері» ДББҰ құқықтарын бұзған ұйымдарға тиісті талаптар қойылды.

Осыған орай, «Назарбаев Зияткерлік мектептері» ДББҰ оқушыларды Назарбаев Зияткерлік мектептеріне түсуге дайындық қызметтерін ұсынып жүрген ұйымдармен, жеке тұлғалармен бірлесе жұмыс жүргізбейтінін ресми хабарлайды.

Конкурстық іріктеудің шарттары және тапсырмалар үлгілері туралы толық мәліметті сіздер тек «Назарбаев Зияткерлік мектептері» ДББҰ www.nis.edu.kz ресми сайтының «NIS-те білім алу» бөлімінен ала аласыздар.